صحيح الواحد بيشوف ظواهر طبيعية وطفرات بتحصل وبتبقي حاجة من الاتنين
يا اما الظاهرة دي بتقي لودقايق وبتختفي بعدها
او انها بتفضل علي طول
مال الجو قلب علي ارصاد جغرافية كدة
رمضان برضه بيحصل فيه ظواهر غريبة زي دي بس للاسف مش دايما سايبة اثر
يعني مثلا تلاقي البنات اللي مش محجبات اتحجبوا لحد المغرب يدن و في بنات تانية ممكن تلبس اسدال طول رمضان بعد كدة خلاص العيد فرحة بقي.
البنات اللي بيحطوا ميك اب تلاقيهم تخلو عن الروج مش اكتر
وتلاقي بعض الشباب اطلقوا اللحية طول رمضان
والمساجد اتملت بالناس والناس بتقف تصلي بره كمع انه في الايام العادية الناس اللي بيدخلو الجامع يعملو يجي 5 او 6 صفوف مش اكتر
ومفيش اغاني شغالة اللي شغال قران بس لحد المغرب ما يدن وبعد كدة تلاقي الاغاني دي اشتغلت وكأنك قاعد في فرح بنت العمدة
وكل ماتسأل حد يقولك اصل احنا كنا صايميين وكأن الصيام دا بيبقي الصبح بس
ولا بقي في ساعات الالتحام بالشعب في المواصلات وتلاقي سواق الاتوبيس ولا الميكروباص نازل شتيمة في مخاليق ربنا اللي ماشية وبعد كل شتيمة واختها تلاقيه يقول استغفر الله اللهم اني صائم
وتيجي تركب بعد الفطار مع نفس السواق وتلاقي لسانه مش بطل شتايم ولما حد يقوله ياحج ميصحش احنا في رمضان يقوله ما احنا خلاص فطرنا.
وكأن رمضان عبارة عن فترة زمنية تمتد من الفجر لحد المغرب بس
وان الصيام دا عبارة عن الامتناع عن الاكل والشرب بس
بجد يا جماعة الواحد لازم يراعي ربنا شوية والطفرات اللي بتحصل دي نتمني انها تدوم للاحسن
Thursday, September 20, 2007
Subscribe to:
Posts (Atom)
