امبارح كنت بتفرج كدة علي برنامج كان بيتكلم عن الفجوة بين الاجيال
بس بصراحة حسيت انها حفرة مش فجوة
هو فعلا في فجوة كبيرة اوي بين الاجيال بنسبة 75%
النسبة كبيرة مش صغيرة بس يتري الفجوة دي جت منين وليه الفجوة كبيرة اوي كدة
بصراحة انا شايفة ان الفجوة حصلت بسبب الاجيال اللي قبلنا ومش احنا السبب فيها ولا التكنولوجيا ولا المجتمع ولا الانترنت ولا أي حجة من الحجج دي
ليه لان مثلا لما تيجي تتكلم مع حد تقوله انت ليه مش قريب من اخواتك الصغيريين او انت ليه مش قريب من ولادك
يقولك اصلهم جيل الموبايل والانترنت طب
وبعيدن في حاجة تانية
ان احنا حتي في طريقة نقاشنا مع بعض مش بنحاول ننزل لبعض
يعني الكبير مصر علي رأيه ومش بيحاول بينزل للصغير والعكس صحيح
الصغير مصر علي رأيه وشايف ان اللي قدامه دا دقة قديمة ومش فاهمه
وان احنا كلنا اتربينا علي اساس ان راينا هو الصح واي رأي مخالف غلط
وان صاحب الرأي المخالف دا جاي من الكوكب الاخر
وفي ناس تانية تقولك اصل ايقاع الحياة بقي سريع ومفيش وقت اننا نقرب من بعض
بس انا حاسة ان المشكلة دي مش مشكلة ايقاع ولا نت ولا الكلام دا
وان دي شماعة بنعلق عليها كل حاجة
المشكلة ان احنا مش بنحاول اننا نقرب من بعض وبنخترع أي حاجة
يعني موضوع النت والموبايل والتليفزيون دا حجة ضعيفة اوي
لان الحاجات دي متوفرة لاي حد واي حد ممكن يستخدمها مش بتقف لسن معين
ومش ذنبا احنا انك مش بتحاول تستخدمها وانك اتأخرت عن اللي حواليك
اما عن طريقة الحوار والمناقشة دي مشكلتها اصلا جاية من التربية
علشان كدو لازم الجيل اللي اكبر مننا يحاول يسمع ويتكلم ويتناقش ويوسعوا دماغهم شوية
ويبقي في مرونة في التعامل
ويحاول انه يفهم ان في فرق توقيت بينا وبينهم وان الدنيا اتغير
يعني كل وقت وله ادان
اما عن جيلنا والاجيال اللي بعدنا فلازم برضو تتكلم وتحاول توصل وجهة نظرها
بكل الطرق والوسايل الممكنة
مش تكتفي بحجة ان دول دقة قديمة ومش فاهمينا
ونسمع لهم لان هما اكيد عندهم خبرة لايستهان بها
اما موضوع الايقاع السريع
فدا عذر اقبح من ذنب
لان مش معقول ايقاع الحياة دا مش فيه ولو ساعتين فاضيين نقعد فيهم مع بعض
واكيد ان الحاجات الغلط ممكن تتصلح
واللي مش ممكن يتصلح ممكن يتحسن
واللي مش ممكن يتحسن ممكن يتضبط
واكيد ربنا خلق لينا 2 ودان ولسان واحد
علشان نسمع لبعض اكتر ما نتكلم
ولا ايه رأيكم؟
8 comments:
بصى يا شيرى ..انا معاكى ان دى حفرة مش فجوة ..
وانتى عندك حق لما قلتى ان الكبار "الاجيال السابقة" ..بتنظر للصغيرين "الاجيال الحالية والقادمة" على انهم مجرد عيال ومايفهموش حاجة وماعندهمش خبرة
...
وكمان الاجيال الحالية شايفة ان الاجيال السابقة دقة قديمة واللى فى دماغهم فى دماغهم ومش عايزين يغيروه
...
بس المشكلة دى صعب اوى تقولى ان حلها ان الاتنين يقعدوا مع بعض ويتناقشوا ويحاولوا يوصلوا لحل وسط
...
لان لا الاجيال السابقة هاتقتنع بأى كلمة هاتتقال ليهم ..ولا الاجيال الحالية هاتقتنع برده
..
والسبب فى كدة بسيط جدا ...نتيجة للانفتاح الحضارى والثقافى اللى احنا عايشينه دلوقتى ده ..قبل كدة ما كنش فى لا كمبيوتر ولا نت ولا موبايل ولا تليفزيون -بس ممكن استثناء التليفزيون ده -
...
فالعقلية بتاعت زمان دى استحالة تتغير ةاستحالة تقتنع
...
لكن هاتلاقى الوضع مختلف تماما بالنسبة للاجيال الحالية المتفتحة واللى عاشت كل التطور التكنولوجى والاقتصادى والثقافى ده ..وبالنسبة للاجيال اللى لسة هاتيجى فى المستقبل
...
وده لسبب بسيط ...ان احنا _الاجيال الحالية _عندنا فكرة عن التقدم والتحضر والتفتح الثقافى ده ..وبالتالى تعاملنا مع الاجيال القادمة هايكون سهل ...ومش هايبصوا لينا على اساس ان احنا دقة قديمة
..
بالعكس ..هانكون قريبين من بعض على الرغم من ان اكيد العالم وقتها هايكون تقدم اكتر وشهد انجازات اكتر من اللى احنا عايشينها دلوقتى
...
بس على الاقل هايكون فى تفاهم عن وضعنا الحالى مع جدودنا ..
..
اتمنى رأيى يكون فادك
...
اوشن ايز كلامك صح
بس انا قصدي يعني ممكن الجيل الاقديم شوية يحاول يصلح من نفسه شوية اصل التقدم والتكنولوجيا دي مش حكر علينا احنا بس
وبعدين انا مش عايزاهم يتغيروا 180 درجة ويبقو روشين بقي وجيل واحدث موبايل واخر رنة والبلوتوث الحاجات دي انا بس عايزاهم يوسعوا دماغهم شوية ويحاولوا يفهموا
ان الدنيا اتغيرت وان احنا برضوا مش معقول هنبقي نسخة منهم
بس يعني الغلط ممكن يتصلح او يتحسن او يتضبط
بس انا معاكي في ان احنا هنكون قريبيين للاجيال الجاية اكتر من اللي سبقونا
عجبتنى طريقة تفكيرك وتناولك للموضوع ورغم اننى أختلف معاكى أن اافجوة دى ممكن تتلم لو الاتنين قاعدوا مع بعض .. بصى على فكرة الاجيال اللى مش عارفة تتماشى معنا واللى همة دقة قديمة يعنى ممكن ببساطة على الأقل يعرفوا طريقة تفكرنا من أنهم يعيشوا التنكولوجيا معانا ويتعمقوا فيها زينا ويتخلوا شوية ‘ن الماضىلاننا دلوقتى فى الحاضر .. بس وأعتقد أن لو دة حصل فعلاً مشكلة الفجوة هتتضائل على الاقل شوية
وأشكرك يا شيرى على زيارتك الجميلة وأتمنى تكرارها
=D
ربنا خلق لينا 2 ودان ولسان واحد
علشان نسمع لبعض اكتر ما نتكلم
جملة اكثر من رائعة بس للاسف كل واحد شايف ان كلامة الصح وانا شايف ان مفيش فجوة ولا حاجه وده امر طبيعى ان يكون فيه اختلاف ما بينا وبينهم وبكرة ولادنا يقولوا علينا دقه قديمة
اولا يا شيري اسمحيلى اشكرك على انك كنتى اول ضيوف مدونتى وده شىء شرفنى مشاركتك فيه واسمحيلي اكون ضيف فى مدونتك بتعليقاتي المتواضعه
بالنسبه لموضوع الفجوه بين الاجيال دي فعلا مشكله والسبب فيها مش بس الاجيال السابقه لا وجيلنا كمان سبب فيها
وانا اتفق مع ان التكنولوجيا برده دافع لان دلوقتى معظم العلاقات الاجتماعيه تعتبر انتهت لان التكنولوجيا حولت حياتنا لمجرد حياه روتينيه الموبايل والانترنت تغنى عن المقابلات الشخصيه والاجتماعات الاسريه ومن هنا كانت الفجوه اما بقى الفجوه الفكريه تحديدا موضوعها كبير اووووووووى
في مقوله بتقول
السكوت من دهب والكلام من فضه
لازم حد يتكلم والتاني يسمع
لاني مش هاينفع الاتنين يتكلموا في وقت واحد
ولا الاتنين يسكتوا في وقت واحد
الوفجوه ديه في رايي مش هاتسد
لان عقبال ما اسدها مع الجيل الي قبلي
هايكون جيل جديد طلع وفاتني
الفجوه ديه اعتقد بيبقي فيها الحكمه وطيش الشباب
ولازم الاتنين يجتمعوا في جيل واااااحد
دا اللى هو عدم الاستماع للرأي الأخر
رأيي هتلاقيه هنا
http://arabub.blogspot.com/2007/10/blog-post_827.html
شركة تسليك مجاري بالقطيف
Post a Comment