تحت مسمي الحب

في يوم من الايام كانت البت صاحبتي واللي بشوفها كل يوم اوشن ايز اللي بموت فيها كاتبة موضوع حلو كدة زي كل مرة عن الحب وان الولاد مش بيحبوا زي البنات وحاجات غريبة كدة قبل عيد ميلادها المنكوب ما يهل علينا ولما شفتها سالتني فين تعليقك قولت لها تعليقي هيكون في البلوج بتاعي

الرد بتاعي يا ستي هو ان الحب الحقيقي موجود بس هو عامل زي العملة النادرة شوية يعني نادرا ما بيكون متوفر بس الاكيد ان في ولاد بيحبوا بجد وابخلاص شديد زي ما في برضو بنات بتحب وبتخلص
بس في حاجات غلط بتحصل تحت مسمي الحب فبتشوه صورة الحب واحيانا بتحصل من غير ما نحس
زي مثلا
** اتنين اعجبوا ببعض , والاعجاب طول شوية (ماهو طبعا لازم يطول لان الفترة دي بتكون كلها مفاجات) يمكن اعجاب من ناحية العقل او التفكير او اللبس او اي حاجة تانية
فواحد فيهم يفتكر انه بيحب التاني ويروح يصارحه بحبه
وبعد فترة مش قصيرة طبعا الاعجاب يتلاشي بالتعود يعني هيبقي حاجة عادية بين الاتنين
ويمكن يلاقو حاجة تانية في حد تاني يعجبوا بيها

** غير كدة اتنين كل يوم بيشوفوا بعض وبقعدوا مع بعض ويتكلموا مع بعض
وفي اي مصيبة دايما سوا وبيعملوا حساب بعض في كل حاجة
يقوم واحد فيهم يفكر انه بيحب التاني
مع ان دا مش حب
الموضوع بيبقي تعود مش اكتر
ويمكن لو بعدوا عن بعض فترة هيحسوا بفراغ شوية وبعد كدة الحياة هتستمر عادي
ويمكن كل واحد فيهم يلاقي حد تاني يقعد معاه كل يوم والخ الخ الخ

** في بقي حب وقتي
وهو مش بيقي حب ولا حاجة
انما كل الموضوع انك لما بتشوف الشخص اللي قدامك دا بتفتكر انك بتحبه اوي
لان انت بقالك فترة كبيرة مش شفته ويمكن يكون له في قلبك مكانة تانية
بس هي مش حب
لانه بعد ما بيمشي مش بتفتكره اوي غير كل ما بتشوفه
(انا اسفة يا تومي بس صدقني المقصود مش انت متزعلش مني) .

** وفي طبعا حب المراهقة
اللي هو فترة وبتعدي يمكن مشاعرنا فيها بتتغير تجاه الاخر
ويمكن نتعلق بيه اوي
بس في الاخر بيأخد وقته وبيعدي
ويمكن نحسبه علينا حب

يمكن في حاجات كتير بتحصل غير كدة وبرضو تحت مسمي الحب
علشان كدة ممكن تكون صورة الحب عليها شوية شخابيط


انما الحب الحقيقي
بيكون هو الحب اللي ولا حاجة من اللي دول
اكيد انا مش عارفة هو ايه بس اكيد احساسه هيختلف عن الحاجات دي كلها ويمكن
يخلينا نشوف حاجات مكناش بنشوفها
والللي مفيش عليه خلاف انه هيكون بالنسبة لنا دفعة لقدام
مش لورا ولا عمرنا هنخليه شماعة لنا لما نفشل في حاجة
يمكن حتي لو محصلش نصيب والموضوع مش انتهي النهاية الطبيعية
بس دايما بنفضل فاكرين اللحظات الحلوة اللي كانت ما بينا
يعني زي اغنية انغام ما بتقول اتمني له الخير
وحتي الاحساس اللي كان بينا عمره ما بيروح

بس هو اكيد موجود وما اظنش ان في بنات بتحب وولاد مش بتحب
اكيد كل واحد له واقعة
بس علشان معروف ان والولاد لعبيين شوية ف دا اللي بيخلينا نحس انهم
مش صادقين في مشاعرهم
بس اكيد بيجي يوم وتبقي مشاعرهم فيه صادقة
والله يا جماعة دا مش تحيز بس انا بتكلم من خلال الحاجات اللي بشوفها

وصحيح هو عملة نادرة بس اكيد موجود