Monday, July 23, 2007

فات 55 سنة ياااه عدو بسرعة اوي ولا حسينا

صحيت النهاردة الصبح وخير اللهم اجعله خير لقيت ماما قاعدة في البيت
وياريتها قاعدة وبس دي قالبة الشقة كمان
قولت لها خير انت مش في الشغل النهاردة ليه؟؟؟ اترفدي؟؟؟؟

قالت لي لاء ياهبلة اترفدت ايه دا النهاردة اجازة رسمي

قولت لها خير هما قدموا 6 اكتوبر
قالت لاء النهاردة 23 يوليو وقولت بقي اما نقلب الشقة و .....(لا داعي للفاصيل)
طااااااااااااااخ

دا اثر الكلمة اللي ماما رزعتها في وشي

قولت بقي لما اشوف ايه حكاية اليوم الاجازة الرسمي اللي جه فوق دماغي دا

لقيت انه اليوم اللي قامت فيه ثورة 23 يوليو وببص لقيت التلفزيون بقي قاعد يتكلم عن امجاد الثورة
ومبادئ الثورة والنجازات اللي اتحققت في عهد الثورة وان لوللا الثورة مكنش حصل تغيير

قولت اما اشوف مبادئ الثورة دي تطلع ايه اللي من غيرها كنا هنحتاس ولقيت ان في حاجة اسمها مبادئ الثورة اللي علي اساسها الثورة قامت وفي تشريعات بعدها حصل زي قانون الاصلاح الزراعي والتعليم المجاني و الغاء الدستور
لقيت اول مبدأ القضاء علي الملكية

وببص لقيت ان احنا لسة في ملكية برضو
يعني ابن الدكتور بيقي دكتور
وابن اللواء بيبقي لواء
وابن الوزير بيبقي وزير
وابن الريس مش هيبقي يعني ابن البطة السودا

المبدأ الثاني القضاء علي الاقطاع
دا علي اساس انه دلوقتي مفيش اقطاع وان الدولة مش بتبيع اراضي لمستثمرين اجانب
ولا حاجة من دي ولا دفعت 300 مليون ولا حاجة علشان تاخد الارض دي تاني
ولا ولا ولا

المبدأ الثالث بناء حياة ديموقراطية سليمة
وطبعا كلنا عارفين ان الحق دا مكفول للجميع بدون اي ضغوط او مشاكل
او ناس بتروح معتقالات ولا مدونين ولا صحافيين بيختفوا
ولا بنسمع عن حوادث غامضة ولا اي حاجة من دي خالص

المبدأ الرابع بناء جيش وطني
زي الجيش بتاعنا بالظبط اللي هو نصه بياخد اعفاء والنص التاني وبيقص الحشيش
ومفيش اي اتفاقيات تنص علي عدم زيادة عدد الجيش او تطويره بالشكل المطلوب
ولا اي حاجة من دي خالص

المبدأ الخامس القضاء علي الاستعمار
يعني زي ما احنا دلوقتي مش مستعمرين ولا حاجة
ومفيش اراضي بتتباع لحساب ناس يهود تحت مسميات عربية
ولا في اتفاقية كويز
وطبعا مفيش معونات بتيجي تخلينا نقول حاضر ونعم من غير نقاش
لانه اضرب المربوط ( العراق) يخاف السايب
وهو هيفضل سايب طول عمره يعني بكرة يتربط

المبدأ السادس والاخير القضاء علي سيطرة رأس المال
متهيأل المبدأ دا اتلغي بقي
اصله كان ايام الاشتراكية
وياريته نفع ما علينا

غير كدة بقي لو اتكلمنا عن التشريعات اللي هي زي مثلا قانون الاصلاح الزراعي
هنلاقي ان مفيش اصلا اراضي زراعية نتكلم عليها فا مفيش لزمة


اما التعليم المجاني فحدث ولا حرج
وبعدين ماهو ايام الملك كان فيه تعليم برضو
اقصد يعني ان كان في ناس متعلمة
يعني مثلا جدي كان متعلم وبيعرف يقرأ ويكتب
والمفروض بقي لو النظام دا كان عبد الناصر اخده من انجلترا او امريكا
فاظن انه اخده برواز بس وياريته صورة
لانهم هناك لحد الثانوية العامة بيتعلموا مجانا وبيتطلعوا يشتغلوا
اما هنا ف والله اللي معاه ماجيستير زي اللي معهوش كلهم علي رصيف واحد
الا من رحم ربي طبعا

اما الغاء الدستور
ف دا بقي لسة موجود بس تحت مسمي شيك شوية
اللي هو تعديل الدستور

وبعدين قولت يعني هو ايه اللي كان هيحصل يعني لو ثورة 23 يوليو مكنتش قامت
عادي يعني ما احنا لسة زي ما احنا محصلش طفرة يعني
ومحتسناش ولا حاجة
وبعدين كان ممكن تقوم ثورة فبراير ولا سبتمبر
مش معضلة ولا حاجة
ولا ايه؟؟؟؟؟؟؟؟








Sunday, July 22, 2007

لازم تحتكي بالواقع

لازم تحتكي بالواقع
كلمة دايما بابا يقولها لي ومفهمتش معناها الا لما فعلا احتكيت بيه لكن للاسف لقيت انه مكنش احتكاك دا كان اصتدام

الناس هنا بالذات بقي في المصالح الحكومية صعب اوي التعامل معاهم لانهم في منتهي البلادة وقلة الذوق والاستهتار ولو الي قدامهم عاملوه بالذوق يسوقوا فيها ويركبوه

يعني انا افتكر مرة ايم الثانوية العامة يعني السنة اللي فاتت كدة رحت اسحب مظروف علشان اعمل اختبارات فنون تطبيقية وسألت الراجل المظروف دا علشان كلية فنون تطبيقية اللي حلوان قالي طبعا وطبعا بعد ما دفعت المعلوم وماليت البيانات وبدي للراجل المظروف لقيته بيقولي لاء انت كانتبة انك هتعملي اختبار عمارة ازاي هنا ياما موسيقي او او رسم اقولت له لاء انا عايزة ادخل كلية فنون تطبيقية

قالي لاء المظروف دا علشان تربية نوعية
وكان نفس الراجل ...... حاجة تغيظ

الموقف التاني
كنت عايزة احول من كلية لكلية وكان في رسوم بدفعها في الخزنة
وطبعا وقفت في طبور طويل عريض واول ما وصلت للشباك
الراجل قالي اصل الخزنة بتقفل الساعة 2 بصيت في الساعة وقولت له بس لسة الساعة
1:30
قالي بيقي ورق الوصلات خلص
وقعدت 3 ايام علي نفس الحال علشان ادفع 6 جنيه

وصراحة الراجل كفاءة بيعرف يخلص نفسه وبيخترع من الهوا وبيشغل دماغه

الموقف الثالث
رحت اعمل ورق البطاقة بتاعت الرقم القومي
قامت الست اللي هناك بتقولي عايزة اقرار ضامن من والدك او ولي امرك
قولت لها طيب
طبعا ربنا يخلي لنا عمو نجيب ساويرس صاحب شركة ام نبيل للمهبول الاولي في مصر
مش عارفة والله من غيره كنا عملنا ايه ما علينا
اتصلت بيهم في البيت وقولت لماما ابعتب بابا انا في القسم ورحت قافلة السكة
طبعا علشان ابويا يجي كان لازم اعمل كدة دا ابويا من زمان وانا عارفاه
المهم السيد الوالد جه وجبنا اقرار الضامن وطلعنا للست تاني
قالت لي طيب انتي مصورتيش شهادة الميلاد وصورة البطاقة بتاعت والدك

قولت لها اصل حضرتك مش قولتي
قالت لي اصلي مكنتش اعرف انك هترجعي تاني النهاردة
(عذر اقبح من ذنب) ..... دا اللي جيه في بالي ساعتها


غير طبعا لما تدخل عليهم في مصلحة التأمينات وتلاقيهم قاعدين زي مايكونوا
بيعملوا طبق اليوم
اللي معاها ملوخية واللي معاها كوسة واللي معاها بامية
وطبعا الرجالة مش هيقعدوا فاضيين يعني
امال المجلات والجرايد عملت الكلمات المتقاطعة لمين ؟؟
وكأن مفيش وراهم شغل والحياة بمبي

وطبعا العبارة الشهيرة اللي هي (فوت علينا بعد اسبوع) مازالت
موجودة


ولا وحدة التأمين الصحي اللي فكرت اروحها مع واحدة جارتنا علشان تطعم ابنها
وتلاقي الوحدة اصلا شكلها يجيب المرض
والشمس حتي متعرفش لها طريق والممرضة مسكة مبرد وبتعمل ظوافرها
وريحة الطبيخ بقي ميتحكيش عليها في قلب الوحدة

انا عارفة ان في ناس عدت عليها مواقف اصعب من دي كتير بس المشكلة ان المحدش بيحاول يشوف شغله كويس بذمة وضمير الدنيا هتمشي كويس
بس ازاي لازم نكلكع ونعقد كل حاجة ونقرف اللي قدمنا
ايه اللي هيحصل يعني لو كل واحد اتعامل مع اللي ادامه بادب
لاء ازاي؟؟؟ امال هيطلعوا قرفهم في مين

وكدة يبقي احنا اكيد في مصر
وتحيا مصر يا عم