Sunday, July 22, 2007

لازم تحتكي بالواقع

لازم تحتكي بالواقع
كلمة دايما بابا يقولها لي ومفهمتش معناها الا لما فعلا احتكيت بيه لكن للاسف لقيت انه مكنش احتكاك دا كان اصتدام

الناس هنا بالذات بقي في المصالح الحكومية صعب اوي التعامل معاهم لانهم في منتهي البلادة وقلة الذوق والاستهتار ولو الي قدامهم عاملوه بالذوق يسوقوا فيها ويركبوه

يعني انا افتكر مرة ايم الثانوية العامة يعني السنة اللي فاتت كدة رحت اسحب مظروف علشان اعمل اختبارات فنون تطبيقية وسألت الراجل المظروف دا علشان كلية فنون تطبيقية اللي حلوان قالي طبعا وطبعا بعد ما دفعت المعلوم وماليت البيانات وبدي للراجل المظروف لقيته بيقولي لاء انت كانتبة انك هتعملي اختبار عمارة ازاي هنا ياما موسيقي او او رسم اقولت له لاء انا عايزة ادخل كلية فنون تطبيقية

قالي لاء المظروف دا علشان تربية نوعية
وكان نفس الراجل ...... حاجة تغيظ

الموقف التاني
كنت عايزة احول من كلية لكلية وكان في رسوم بدفعها في الخزنة
وطبعا وقفت في طبور طويل عريض واول ما وصلت للشباك
الراجل قالي اصل الخزنة بتقفل الساعة 2 بصيت في الساعة وقولت له بس لسة الساعة
1:30
قالي بيقي ورق الوصلات خلص
وقعدت 3 ايام علي نفس الحال علشان ادفع 6 جنيه

وصراحة الراجل كفاءة بيعرف يخلص نفسه وبيخترع من الهوا وبيشغل دماغه

الموقف الثالث
رحت اعمل ورق البطاقة بتاعت الرقم القومي
قامت الست اللي هناك بتقولي عايزة اقرار ضامن من والدك او ولي امرك
قولت لها طيب
طبعا ربنا يخلي لنا عمو نجيب ساويرس صاحب شركة ام نبيل للمهبول الاولي في مصر
مش عارفة والله من غيره كنا عملنا ايه ما علينا
اتصلت بيهم في البيت وقولت لماما ابعتب بابا انا في القسم ورحت قافلة السكة
طبعا علشان ابويا يجي كان لازم اعمل كدة دا ابويا من زمان وانا عارفاه
المهم السيد الوالد جه وجبنا اقرار الضامن وطلعنا للست تاني
قالت لي طيب انتي مصورتيش شهادة الميلاد وصورة البطاقة بتاعت والدك

قولت لها اصل حضرتك مش قولتي
قالت لي اصلي مكنتش اعرف انك هترجعي تاني النهاردة
(عذر اقبح من ذنب) ..... دا اللي جيه في بالي ساعتها


غير طبعا لما تدخل عليهم في مصلحة التأمينات وتلاقيهم قاعدين زي مايكونوا
بيعملوا طبق اليوم
اللي معاها ملوخية واللي معاها كوسة واللي معاها بامية
وطبعا الرجالة مش هيقعدوا فاضيين يعني
امال المجلات والجرايد عملت الكلمات المتقاطعة لمين ؟؟
وكأن مفيش وراهم شغل والحياة بمبي

وطبعا العبارة الشهيرة اللي هي (فوت علينا بعد اسبوع) مازالت
موجودة


ولا وحدة التأمين الصحي اللي فكرت اروحها مع واحدة جارتنا علشان تطعم ابنها
وتلاقي الوحدة اصلا شكلها يجيب المرض
والشمس حتي متعرفش لها طريق والممرضة مسكة مبرد وبتعمل ظوافرها
وريحة الطبيخ بقي ميتحكيش عليها في قلب الوحدة

انا عارفة ان في ناس عدت عليها مواقف اصعب من دي كتير بس المشكلة ان المحدش بيحاول يشوف شغله كويس بذمة وضمير الدنيا هتمشي كويس
بس ازاي لازم نكلكع ونعقد كل حاجة ونقرف اللي قدمنا
ايه اللي هيحصل يعني لو كل واحد اتعامل مع اللي ادامه بادب
لاء ازاي؟؟؟ امال هيطلعوا قرفهم في مين

وكدة يبقي احنا اكيد في مصر
وتحيا مصر يا عم



4 comments:

ftataljanna said...

يخرب عقلك يا شيري ايه يا بنتى

:)

ده انتى الاجازة جننتك يا عيني

وتروحى الوحدة الصحية لييييييييييه

اظن كنتى بتغنى انا اللى جبت ده كله لنفسي انا اللى جبت ده كله لنفسي ههههههههه

وبعد الهزار

يا شيري يا حبيبتى كل حاجة بقت كده الايام دى كل الناس كده مابقاش في حد بيعمل شغله باخلاص

بس في دعوة بقى يا قمر للتغيير الا وهى

انه بدل ما ننقد
ننقد ونقدم حلول

يعني فكرى الحكاية دي تتحل ازاااااى

وابداى بنفسك
اعملى كل حاجة مفروض تعمليها باخلاص

:)

اسمعي يا بنوته

هاحط لك لينك ابقى ادخلى شوفي الموضوع اللى عليه

وابقى ادخلى شوفى المدونات اللى عندى
مدونات محترمه وهاتعجبك

سلام يا قمر وابقى كلميني ولا رنى لى ولا اى حاجة

سلام

ftataljanna said...

http://elbawaba.blogspot.com/2007/07/blog-post_20.html

زورى الموضوع ده

Anonymous said...

عمري ما سيبت كومينت لحد.ولا لبيت دعوه حد.بس انتي مش حد.ولازم اقولك حل للموضوع ده.الطريقه الاولي وهيه للشباب بس طريقة صباح الفل.يعني تدخل علي الموظف سوري قصدي الباشا من دول(اللقب ده مؤقت طبعاا لحد ما يخلصنا)وتقوله صباح الخير ازيك يا باشا معلش هنتعب اهلك معانا قصدي سيادتك معانا عاوزين نعمل كزا(وطبعاا هيكون طلبك اي حاجه غير هوه الكام بقي بكام)وطبعا ابتسامتك من اول ودنك اليمين لحد العصب الخامس اللي انا معرفش مكانه فين اساسا.تقريباا جمب الحي السادس بالظبط اوتوبيس سته وعشرين شرطه او اندر سكور لان انت في بلد متحضر ومنظم .وتقوم زي الشاطر تطلع علبه سجايرك الحمرا لازم طبعاا لان الباشا بتاعنا مبيصدمش سجاير الا لو كانت حمرا وتولعله.ولو مبتدخنش برضه تشتري علبه قبل ماتروح المصلحه (محدش يفهمني غلط)انا قدي المصلحه الحكوميه.هتلاقيه يقولك طيب ويقعد يشرحلك اه ايه الطلب بتاعك صعب وهيتعبه والتعليمات اللي هوه هيكسرها علشان يعملك طلبك.اااه طبعاا ما هوه تعليماته انه ميريحكش.امال انت فاكر ايه.المهم بعد ما يسمعك ويفرجك علي الكليب ده تدنجله انت وتقوله معلش يا باشا والله انا هقدر تهبك وليك الحلاوه.هتلاقيه يخلصلك طلبك في دقايق وتقوم انت زي الامور تطلعله حاجه لله بقي عند ربنا.وفي دماغك طبعاا هتدعيله دعوتين حلوين اولهم بالسم الهاري يا ابن ...اه ومتنساش لو انت قلبك جامد بعد ما يخلصلك المصلحه تفك منه وكفايه عليه السيجاره الحمرا.ومتنساش برضه بعد ما تخلص وانت خارج من المصلحه تتف.ده طلب شخصي لاخوك.الطريقه التانيه للانسات.
تصحي في اليوم الموعود تستحمي وتلبسي وتظبطي ميكب حتي لو انتي منقبه.تقلعي النقاب لانك رايحه مصلحه حكوميه يعني رايحه تجاهدي طبعاا وعزرك معاكي.وتلبسي جيبه حلوه كده ويستحسن لو قصيره.وتدخلي علي الموظف من دول وتقوليله هاي صباح الخيييييييييينن.وتقفي قدامه علشان يشم ريحه البرفان.هتلاقيه يشدلك كورسي ويقولك اتفضلي وهيبقي شهم جداا وموظف مثالي.وهينقضي طلبك.سامحهااا يا رب.علي فكره لو عملتي كده وفي موظفه بدل الموظف المصلحه هتنقضي برضه بس بعد ما يبقي اسمك ام احمد ووائل وامنيه وجوزك طبعاا اللي هيعاني انك عايشه معاه بمناخير معضوضه في يوم اسود زمااان كنتي فاكره ان اللي في المصلحه موظف مش موظفه حيزبوون.
الطريقه التالته للشباب الي ميعرفش يدنجل للباشا الموظف انك تيجي علي نفسك وتلبس جيبه بدل البنطلون وتعمل زي العانسه سوري قصدي الانسه اللي قبلك ما عملت بالظبط.
الطريقه الرابعه للانسات اللي مفيش امل منهم حتي لو عدلوا شكلهم بالفوتوشوب انك تتكلي علي الله بقي وتقفي في الطابور وانتي ونصيبك وربنا معاكي بقي.
وعلي فكره كل ده وان دل بيدل علي ان بلدنا بلد متقدم ومنظم بدليل ان كل شيخ وله طريقه زي ما شوفتي كده.وان بلدنا متقدم في علم الاجتماع.
طلب اخير.يبقي ابعتي لابوكي بليز دونت كول مي بدل ما تتصلي بيه.ده طبعاا اوفر لرصيد ما انا اول مره اشوف حد بيتصل بابوه الايام ديه.
وكفايه كده بقي الصفحه ديه شكلها متراقب وهنروح القناطر سوي جماعه كلنا ان شاء الله.

ابوعدي للتسوق said...

شركة مكافحة حشرات بالجبيل